唔知大家知唔知「六道」係乜，我喺度略略講吓：分別係三善道，天人、阿修羅、人；同埋三惡道，畜牲、餓鬼、地獄。今世下世入邊道都係根據因緣果報，當然呢六道會再細分好多唔同品種，唔係做天人就一定係最好，不過落地獄都一定係最大鑊。我聽過一個好有趣嘅因果例子，譏謗佛教三寶嘅人（上一篇有解釋咩係三寶，絕對唔係的士、巴士同女司機），會投胎去非洲，因為嗰邊冇乜機會接觸到佛法而環境惡劣，受苦之餘，距離「離苦得樂」就更加遠了。

我亦都有問過啲師兄，如果嗰個人係投胎咗去非洲還債，咁我幫佢係咪影響咗因果作業？對方話，我佛慈悲，其實每個人都Deserve a second chance。我聽到呢度其實我覺得好感動，每一個人都應該要有一個改過嘅機會，而我聽到呢度，另一個感動位係，佛學答咗我呢個困擾十年嘅問題。

我中學嗰時係一個好虔誠嘅基督徒，集會領經嗰種。點解我會脫離咗基督教？只係因為我對人生太多疑惑，聖經老師覺得我搞事，動搖其他同學嘅信仰心，所以禁止我再上任何聖經堂。

其實我都只係問：如果冇輪迴機制，點解非洲啲小朋友一出世就受苦？

老師：因為佢哋應承咗上帝要做大家嘅小天使，畀大家知道自己有幾幸福。

我：我哋都係上帝創造，點解上帝唔創造到我哋識得感恩，咁就唔使其他人受苦？

老師：呢啲係上帝嘅旨意，不要問只要信。

我：你吓吓叫我唔好問，我日日食玩瞓，咩都唔問係咪就係上帝最想嘅事？同圈養啲豬有咩分別？

老師：你咁唔信，就唔好再上堂。

我：唔係我唔信，係你冇辦法令我再相信。

自此之後，我就喺校務處過每一個聖經堂，亦都冇再相信過基督教。我相信基督教導人向善係一個好嘅信仰，只係人類呢樣嘢，真係「其性剛強，難調難伏」（來源自地藏經）。得人身其實係一件難得嘅事，唔修佛都可以修行，做好自己、唔害他人，就已經好超班。大家加油！