Peter：《聖荷西謀殺案》五月一日晚上場次

首先，與各位闊別一段時間。希望大家安好。

十二門徒的初心，是不在俾面派對下，提出一些作為觀眾的感受，希望劇場進步。而且，希望透過討論，可以吸引更多的觀眾入場。

對於《聖荷西謀殺案》，門徒之間也有過有火花四濺的討論。觀點未盡相同，但大部分偏向是覺得有點失望的，包括Peter 在內。

好處當然是以田蕊妮、潘燦良、莊梅岩夠號召力，可以吸引到一批新的觀眾入場，劇場需要觀眾，並且需要更大量的觀眾。在這一點上，《聖荷西謀殺案》，是成功的。在佈景、燈及劇本上，新的觀眾都幾覺得「有嘢睇」。

但吸到到觀眾之餘，我們希望不只於此，更是呈現一個高製作水平、極具劇力的作品。似乎高製作水平是達到了，但此劇離滿意尚有一段距離。

網上的評論（例如劇場𠝹櫈區等），覺得佈景、燈、音效做多咗。原則上我是同意的。導演透過運用這些技巧來推進，而不是透過劇本分析，挖出三個主要角式(Ling, Tang 及Sammi)的衝突及關係，來推動情節。推進唔夠紥實，觀眾同演員也在睇/做最表面那層，沒有產生同呼同吸感覺。所以冷靜到當潘燦良在尾場爆粗，觀眾沒人覺得他的容忍過了極限，現場竟有發出笑聲的。

演員們是努力的。但我們希望導演在理順劇本上處理得更多，不只是在佈景音效上大大著力。

劇本空白的地方，導演透過角色設定，把角色的action合理化。例如，當Tang拎支棍回家與Ling攤牌，他拎支棍回家的動機是什麼？是恐嚇Ling ? 還是一早巳經有殺人計畫？如果他立心要殺人，Tang又當Sammy是什麼角色？幫兇？ 當時他並未知道Sammy香港發生的事情，如果是預期Sammy會幫他殺Ling, 就要假設他知道Sammy也想殺Ling。但Sammy的設定是通過Ling而令自己相信世上還有幸福這一件事情。要Sammy推翻自己的信念，又似乎不太說得過去。那Tang是一早預計Sammy會協助他（基於什麼他有這相信？）；還是只是Tang知道Sammy的過去，才即興慫恿Sammy自衞殺人？

當之前沒有足夠的設計及鋪排，觀眾們只看著台上演員「原來你咁發展」，跟導演理順了動機動作，令觀眾代入角色，「我係佢我都咁做」是不同的層次。這是一個探討人性不同面貌的劇本，可玩味的人性衝突不少，而不只是金句式的「你說的是生存，而我說的，是如何生存得有尊嚴」。它不只是金句，也是角色的影照，（例如Tang就是由生存進入生存得有尊嚴而對Ling的反抗）。

佈景方面，最外面的一個佈景是大屋的原型，金屬色為主，許多間隔。佈景想營造一個竉牢的感覺，是明白的。然而，背景是一個在樹林中四野沒其他建築物的華人大屋，是一對夫婦為逃避過去而匿藏的地方，如此華麗eye catching ; 已經與夫婦想低調逃避的設定有點不合。而且，基本上沒有場口在二樓或睡房進行。而很費週章地搭了二樓（不只是樓梯）而沒有實際場口，只是分散觀眾的注意力。亦佔據了台位。（劇本有樓梯引上二樓的），台上focus太多了。

最不理解是聲效，每次轉場，就用好重的bump bump bump咁提示觀衆，「悲劇進行中」、「有大件事要發生」。編劇已經在劇本中留下伏線，表面的和諧和底藴的cover up 在並行。如果不在角色設計上鋪排，推上去造成三個人處境上衝突，Tang同Sammy聯手殺人的合理性，是比較困難的。
例如Ling說有睇Sammi 個blog; Sammy會避：「係咩…我都好耐冇寫」。「…冇呀。」這些伏線輕輕帶過，是否有點可惜的。

今次感覺是沒有多大處理角色間的衝突，只變成只是言語上的衝突，甚至有部份更加變成gag、笑位。亦不能清楚看到三者的關係。

Ling理性克制嚴謹有計劃，從小的補習養家以至借助嫁華僑脫貧。清楚顯示Ling是一個有計畫的人；她有計畫利用Sammy的探訪成為她踏出逃避的第一步，事情發展卻是不似預期。相比Sammy的隨意relax; 呈現在Tang面前的是兩個極端。從而Tang 在Sammy身上找到缺失良久的隨意。Tang本質就不善於計畫，而他又偏偏想做業務策劃的矛盾。

Sammy 在香港絕望而希望在Ling身上看到生活仍然可以有幸福的一面。她一直「相信」Ling是幸福的投射上生活仍有幸福。她越相信Ling 好幸福才更有後來最後一場的誤差。

三個主要演員中，田蕊妮演出最亮麗 。尤其她㩒住度火叫Sammy勸Tang留家湊小朋友。又或者佢叫Sammy拎隻碟俾Zoe，她的身體語言已經交侍咗她是特別安排該意外的。唯一就係最尾那場Ling同Tang攤牌;,她的處理有點太過冷靜，而佢同Tang攤牌時，節奏又有點太過急促，然而該段對白應該是高潮，卻沒有擦出火花。

潘燦良的表現是有點令人失望的。他選擇呈現的choice有點怪。有其他門徒覺得Tang變成了爛仔般。我覺得Tang說的話不是幽默而是passive aggressive; 在cover up 不滿，但現在部份卻變成gag。Sammy的設定不一定係索，但Sammy起碼令到Tang覺得放鬆而Ling永遠只令他繃緊。但當潘燦良和溫玉茹同場，又或者同田蕊妮同場，對比反差其實沒有明顯層次。又或者在此劇開始時潘燦良及溫玉茹仍然陌生，但physical distance 過於親密，是令我看得有點怪怪的感覺。Sammy是隨意但不是隨便。

我們會期望每一個場口也如壓力煲般不斷向上推，在最後一場是臨界點。當前面沒有把三人之間的張力建構成，更多時間我們見到是三個主要演員自救mode。可能我們更想看到導演在三者間關係的協調，或把溫度提升上去。

當中比較失望的是溫玉茹的表現。老實說她是我一個幾喜歡的演員。由2012年《驚爆》已經留意上她。首先，今次她在此劇的造型幫倒忙。Sammy不是十三點；也不能是十三點。造型我接受是九十年代，但真係有點難看。而她的處理多了依靠本能，而少了一點設計。

這篇不能算是劇評，只能是一個分享。能夠全部門票售出是一件令人高興之事。（劇場人在過去一年真係捱得好辛苦），愛之深，責之切。久未執筆，文中每有沙石。大家見諒。

Judas：《聖荷西謀殺案》，演藝學院歌劇院，Judas看了2021年5月1日的場次。

聽講依家講真話係要道歉嘅，ＯＫ，講聲唔好意思先。

Judas看完劇，離場，跟師兄弟們訴說自己的不滿。

看到師兄的回覆我就知道，這一篇一定是寫來討人厭的了。

市道不好、世道不好，喺呢個時候話人唔好？心裏惴惴不安。

好在，《聖荷西謀殺案》票房報捷，聽說已然爆滿，咁都賣晒飛就唔怕講啦。

已經re-run多次，情節不再說了。劇本耳熟能詳，處理又可以有多令人失望呢？

Well, very 。

今次導演喺閱讀劇本然後處理出嚟方面，係有幾個失敗。

「一個陌生的城市，三個異鄉人互揭底牌所引致的殺人事件。」人在異鄉十年，日對夜對困獸鬥，Tang當然可以厭惡太太Ling的佔有慾；Ling當然也可以懷疑Tang出軌；Sammy也可以對Ling又羨慕又妒忌。三個人就係咁你搞下我、我搞下你、你撩下我、我撩下你，然後搞出最後殺人大高潮。

先唔講殺人善後個plan合唔合理，呢個唔係現實世界，我哋唔駛幫佢諗殺人後點收科。

劇本作為劇本就會有同現實「唔同」嘅地方，編劇同導演嘅作用係令觀眾入局，buy in 設定，跟從設定去思考劇情嘅走向，然後結局時嘅surprise 要係同觀眾心中諗嘅「合理劇情走向」唔同，而唔係同現實世界嘅合理結局唔同。所謂「情理之中，意料之外」其實係講呢樣嘢，而唔係去研究喺聖荷西呢個地方係咪罪惡城到是但挖開一個後園都搵到雙屍命案。

喺呢個咁同情地理解嘅背景下，我想講幾樣嘢：

一、sammy的設定：
sammy無可避免要係個索女，而且佢嘅背景係可以搞到男上司拋妻棄子嘅舞蹈員，點會冇玩男人嘅手段？依家個處理方法係sammy係個13點，仲要係個衣著師奶嘅13點，咁點會引人犯罪？引到tang 無論係情感上同現實需要上同佢合謀？嗱，我冇話溫玉茹唔索，係佢個設定只能夠用煩膠嚟形容，成陣索味冇咗，捉到鹿唔識脫角。

二、sammy同tang 二人關係：
承上，sammy 係要同tang 有種若即若離，曖昧互動，tang 直頭係要喺中段present到覺得呢個女仔就係解決佢中年危機嘅唯一方法，咁最後先會有信心sammy 會同佢合謀，仲俾條木方（？！）佢。
所以中段個強吻係幾咁重要，first run嘅處理係有種強吻接近強姦而sammy係半推半就嘅暗示。然後sammy突然抽身，搵嘢扑tang ，tang 清醒翻，但係仲可以用嚟講笑（「乜我仲扯得起咩？」）二人喺呢次性侵後仍然可以保持良好關係，兩個人都一定要有一定程度嘅吸引力先可以講到落去。唔係一個師奶一條地盤麻甩佬可以搞得成。

再者，tang係一直唔知sammy呢個「搞到男上司拋妻棄子」嘅前科，即係話佢嗰個叫sammy「重新開始」嘅誘因係最後improvise出嚟，咁問題就更大了。如果佢一直知道，都仲尚且話係一直用心理暗示情緒勒索引sammy做同謀。如果佢唔知，即係佢一直以為自己呢個中佬真係可以令到sammy為佢殺人，哪來的自信呢？都係嗰句，兩個人都一定要有一定程度嘅吸引力先可以講到落去。唔係一個師奶一條地盤麻甩佬可以搞得成。

三、結局高潮：
承上，因為sammy同tang二人嘅合謀唔合理，最後tang 仍然信sammy會同佢同謀就完全唔掂。條木方真心唔知想點，你話係老牛都仲話殺人見血，木方一定唔係一個friendly嘅殺人凶器。最後我只係見到sammy 到最後一刻仍然好崇拜ling ,而Ling係知道嘅，所以先至咁氣定神閒翹晒腳坐喺度。 sammy 點會落手？最後個懸疑邊度係懸疑？

「究竟 sammy 係點死㗎！？」

好老實，最後一幕，sammy如果回身扑tang 我覺得反而救到齣戲。

導演似乎都好清楚結局嘅問題，所以喺燈滅之後，佢喺好嘈雜嘅電音裏面加咗distort咗嘅槍聲同鏟泥聲，暗示暗示再暗示呢場鬧劇係以Ling自衛完結，低手到我直頭有啲嬲。

低手嘅仲有個舞台。個大監倉係咪出得滯呀？係咪嘥咗啲呀？阿tang每次瞓覺退場唔駛再俾觀眾望住佢行上樓有幾咁搞到導演講唔到個故事呀？講吓講吓，度火又標翻上嚟。

滿肚苦水、一腔怒火。

Judas真係想話個劇好睇呀，但係唔得呀，其實呢個劇裏面我見唔到導演想講好個故事嗰種熱情、見唔到劏開自己俾人睇嗰種真誠。我唔猜度點解會冇咗呢種真誠，但係我諗，喺呢個咁嘅時勢仲有劇想上，個想講嘢嘅欲望應該係超級無限極咁大。但係我睇唔到。

總的來說，這個run，Judas 係唔滿意嘅，希望將來有更能看得通編劇圖謀嘅導演，能夠真真實實做一場好戲。