你問我理唔理性？食懵左咩，作為一個知識份子，我又點會唔理性呢？

 

不過，我每星期都會買六合彩。點解？六合彩咪即係投胎券囉。

 

其實唔好話咩香港既社會流動性低。向上流既機會一直存在，而向上流既大門一直係打開既。我一直好鍾意藍色，因為向上流嘅機會就係藍色既－－佢個名叫馬會。

 

每次走入馬會，我都有種脫胎換骨嘅感覺，果下你會 feel 到，其實三千萬隨時走入自己戶口，你會開始諗，有三千萬點用好？買幾層樓收租？買架靚車？Anyway，總之諗點洗本身個過程都已經係一種享受，一般學院啲我地叫 intrinsic value。即係投注本身係有一種內在價值。

 

再講落去，劃 number，其實就係用自己既手去決定自己既將來。大家平時講獅子山精神，努力向上，要懂得運用智慧去喺市場度贏得大錢。其實六合彩就係自己決定自己人生嘅表表者！你用枝筆，劃幾嘢，人生好可能因為你劃上咗一格同劃下咗一格就完全唔同晒。

 

到比錢果嘢，佢同你講：「先生，祝你好運。」呢句真係聽到人由個背脊舒服到返個心口再全身有種 aura 喺度。因為佢祝你好運果吓你會覺得自己多咗運同已經拎咗3千萬落袋。跟住又loop返去諗3千萬點洗。

 

好多人話，買六合彩係傻仔先買，我話你先係傻仔。要計佢中獎機率唔難吖：6/49 X 5/48 X 4/47 X 3/46 X 2/45 X 1/44 = 720/10068347520 = 0.000000071511238420185162619416617037867

 

至少佢係高過0低過1。0.000000071，你話細？睇你點睇啦。我只係知道，我自己努力打份工既話，我既概率係 0 囉。而家咪好興阿源有句：「我覺得我是零」嘅。大家如果認真啲諗，阿源嘅意思最深層次係講緊我果句：「我覺得我是 0」。

 

買咗六合彩，我至少可以講句：「我覺得我是 0.000000071」丫。十蚊人生感覺唔同晒，唔值咩？講完你係咪都好想買？

 

講住咁多先，我仲要諗果三千萬點洗。Good night!