【角色名同性格都似埋】《大帥哥》係《Keroro軍曹》真人版？

無綫劇集《大帥哥》現正熱播中，張衛健（Dicky）難得回巢拍劇，梗係唔會令大家失望，唔少觀眾都話睇得好過癮。除咗劇中有大量金句之外，劇中演員們都引起大家熱烈討論，好似最近就有網民話《大帥哥》好似日本動畫《Keroro軍曹》嘅真人版。

點解一套民初劇會似日本動畫呢？第一，佢哋都係以軍人作為角色背景，好似張衛健喺劇中飾演旅長狄奇「狄大帥」，佢聰明又有口才，獲得部下擁護，而Keroro軍曹都係隊長，都係得到部下愛戴。第二，佢哋同樣有四位得力部下，狄奇有徐榮飾演嘅羅義、洪永城飾演嘅馬炭、李嘉飾演冬來及曹永廉飾演顧落蘆；而Keroro就有Tamama、Giroro、Dororo同埋Kururu。

除此之外，網民仲發現佢哋個名同埋性格都好相似，馬炭就係Tamama、羅義就係Giroro、冬來就係Dororo，而顧落蘆就係Kururu。佢哋嘅性格好相似，好似顧落蘆喺劇中擔任軍師，初頭係麥先根（彭懷安飾）嘅軍師，之後反目過檔去狄奇嗰邊，負責出謀獻計，同Kururu一樣聰明，係隊中嘅智囊。

唔少網民都紛紛留言話好似，仲大讚度橋嗰位好嘢同埋二次創作得嚟又有心思。